Ipar Euskal Herriko 10 herri elkargoak hirigune elkargo bakar bat bilakatuko dira heldu den urtarrilaren 1ean, lanpostu, garraio, ingurune, euskara, laborantza iraunkorra, goi mailako erakaskuntza eta etxebizitza, etab. kudeatzeko, tresna eraginkorrak izanen dituena.

Denak batuko gaituen Herri Elkargo berri honen kudeaketa, funtzionamendua eta zerga sistema plantan ezartzeko, Ipar Euskal Herri osoko hautetsiak bilduko dira eta eztabaidatuko dute gaurdanik utarrilaren 1a arte.

Denen parte hartzearekin eta baldintza hoberenetan plantan jarri dadin erakunde berri hori; euskal moneta, kostaldea eta barnekaldearen arteko elkartasuna, laborantza herrikoia, euskara, ingurunea eta tokiko lanpostuenganako zinezko ausardi batekin; Batera elkarteak jai-elgarretaratze handi bat antolatzen du uztailaren 27an asteazkenarekin arratseko 19:00etan, Baionan, Xaho Pelletier pentze gunean.

Egitarauan: kantuak, dantzak, adiskidantzazko basoa, eragileen hitzaldiak, eta Euskal Herri Elkargoaren denen arteko plantan ezartze sinbolikoa.

Bizi garen une historiko horren ospatzeko parte hartzerat gomitatzen zaituztegu, zeren eta Herri Elkargoarekin gure lurraldea hobe ezagutua eta antolatua izanen da, eta bere beharrei erantzuteko baliabide gehiago izanen ditu.

Euskal moneta, Ipar Euskal Herriko garapen Kontseiluan duen parte hartzearen bitartez, prefetak proposaturiko hirigune elkargo bakarreko proiektu hori bermatu duten arlo guzietako erakundeetakoa da. Proiektu horren alde bozkatu dute Ipar Euskal Herriko herriko etxeen %70ak, biztanleriaren %66a eta udal hautetsien %74a ordezkatzen dituztenak.

Herri Elkargoari buruz xehetasun gehiago :
www.communautepaysbasque.org

Mendekoste asteburuan, maiatzaren 22tik 24ra, Euskal Monetak frantziar Estatu osoko lekuko moneten biltzarra errezibituko du.
Frantzia mailako herritar moneta horien sustatzaileen artean elkar ezagutzeko eta trukatzeko aukera emanen du asteburu horrek. Topaketa horietan, Bidarteko ESTIAn iraganen diren tailerrak eta lan bilkurak izanen dira. Euskako kideei irekiak dira, eta hemen bertan, izena eman dezakete parte hartzeko.

Jarraitu irakurtzen →

Euskok hitzarmen bat izenpetu du Euskal Herriko Etxe Ekoizleen Elkartearekin (APFPB), laborantza herrikoiaren sustengatzea helburu amankomuna dutelako.
Batak bestearen promozioa eginen du (beren kideengan, internet guneetan, ekitaldi publikoetan…) eta tokiko monetaren garapenean parte hartuko duten APFPB-Idokiko laborarien kopurua emendatzerari buruz lan eginen dute.

Idokiko 108 ekoizleen arteko 25 kidek jadanik euskoa onartzen dute (Eusko eta APFPB kideen zerrenda), eta besteen parte hartzea erresteko, APFPB-Idoki kideei proposatua zaie urteko harpidetza prezio-erdian pagatzea, 30 eusko/eurotik hasiz, 60 eusko/euroren ordez. Aurrezte hori preziagarri izanen dute kalitatezko laborantza baten alde engaiatzen diren ekoizleek, jadanik urte-sari bana pagatzen baitiote, bi sareetatik bakoitzari.

Jarraitu irakurtzen →